Mantenshon Grandi den área di Rif a kuminsá

Mantenshon Grandi den área di Rif a kuminsá

Dia 10 di yüli último a tene e “kick-off” ofisial pa e trabounan di Mantenshon Grandi riba e kasnan di Gobièrnu i di FKP den área di Rif.

Entre esnan presente i a hiba palabra tabata, Minister Suzy Camelia-Römer di GMN, Minister Hensley Koeiman di SOAW i Minister Zita Jesus-Leito di VVRP huntu ku Direktor di FKP, Sr. Arthur Con. Tur na nan turno a duna di konosé ku nan ta kontentu ku a start i ku nan lo sigui sostené e trabounan aki pa bienestar di e habitantenan i tambe  ku ta importante pa aweró, tur esnan ku ta bishitá e área, por mira kon bunita nos siudat ta.

Representante di bario di Rif, Sra. Marusca Manuel tambe a duna di konosé ku e ta hopi kontentu ku porfin e trabounan ta kuminsá, paso ta algu ku e habitantenan tabata anhelá ya pa hopi tempu kaba.

Sra. Lysandra Martis di parti di Federashon Otrabanda, tambe a ekspresá ku nan ta kontentu ku e mantenshon grandi a start i ku e tin e speransa ku esaki lo ta un empuhe pa e desaroyo den Otrabanda i Rif en partikular.

Fasenan.

En total lo atendé 165 kas den 3 fase. Di esakinan 70 kas ta di  Gobièrnu i 95 kas ta di FKP.

Den fase 1 lo hasi mantenshon riba e kasnan den Rifwaterstraat, Rifwaterstraat kasnan nieuwbouw, Sint Martinussteeg, Cartagenastraat i Zaantjes-steeg. Tambe lo hasi reparashon preventivo na e monumento di Consientiesteeg 74 pa esaki no sigui dekaí.

Si tur kos kana segun plan fase 1 lo dura for di Yüli 2019 te ku desèmber 2019.

Kiko lo wòrdu drechá.

E trabounan lo konsistí prinsipalmente den kambia o drecha plafòn, pone o kambia mosaiko di flur, drecha flur di palu, kambia o pone mosaiko di muraya den baño i kushina, drecha stopkontakt i switch di koriente, i kaminda ta nesesario lo kambia kashi kushina, labamano i pochi wc, tambe lo revisá porta i bentananan i lo kambia esakinan kaminda ta nesesario, lo drecha dak ku ta lèk, revisá hit, kap mata ku por hasi daño na struktura di e kas, asina evitá skermentu.

Drechamentu di murayanan ku kanker lo sosodé despues di konsulta entre FKP i Monumentenzorg.

Punto di kontakto.

E trabounan lo wòrdu hasi dor di 15 kontratista kual kada un a haña 5 kas na nan enkargo.  Riba kada 5 kontratista tin un “opzichter” di FKP pa kontrolá e trabounan. E kontratistanan tin instrukshonnan estrikto pa traha solamente riba e tareanan ku nan a risibí di FKP.

Durante e trabounan por sosodé ku bo tin mester di mas informashon òf bo kier tuma kontakto ku FKP pa kual sea motibu.

Pa esaki nos ta pone un number di Whatsapp disponibel kaminda bo por manda un teksto, mensahe di bos i tambe potrèt.
No por yama e number aki ya komo e no ta konektá na un telefòn.
E number en kuestion ta: +599 9 6691910.  Tambe por manda mail na:  RIF@fkp.cw

Den luna di sèptèmber lo tene un enkuentro ku habitantenan pa nos tende kon kos ta kanando i tambe pa duna informashon riba vários aspekto.

Programa di Televishon.

FKP den koperashon ku Ministerio di VVRP ta produsí e aña aki 3 programa di televishon dediká na e trabounan di mantenshon grandi di e kasnan di Gobièrnu i FKP den Rif.

E promé programa a pasa 15 di yüni, 7’or di anochi na Nos Pais TV, 16 di yüni, 7’or na TeleCuraçao i 17 di yüni 6.45 anochi na TV Dirèkt kanal 13.

Pa esnan ku lo kier bolbe mira e programa, por subi nos página di Facebook : FKP-Fundashon Kas Popular i tambe Mediateka di FKP riba nos website www.fkp.cw i buska “MANTENSHON DI KASNAN DI RIF”.

E siguiente programanan lo ta den Òktober i Desèmber, Ora ta asina leu, nos lo anunsiá e fechanan di transmishon.¨